עזרא8

ע חא וְאֵלֶּה רָאשֵׁי אֲבֹתֵיהֶם וְהִתְיַחְשָׂם: הָעֹלִים עִמִּי בְּמַלְכוּת אַרְתַּחְשַׁסְתְּא הַמֶּלֶךְמִבָּבֶל. ע חב מִבְּנֵי פִינְחָס גֵּרְשֹׁם מִבְּנֵי אִיתָמָר דָּנִיֵּאל מִבְּנֵי דָוִיד חַטּוּשׁ. ע חג מִבְּנֵי שְׁכַנְיָה מִבְּנֵי פַרְעֹשׁ זְכַרְיָה וְעִמּוֹ הִתְיַחֵשׂ לִזְכָרִים מֵאָה וַחֲמִשִּׁים. ע חד מִבְּנֵי פַּחַת מוֹאָב אֶלְיְהוֹעֵינַי בֶּן-זְרַחְיָה וְעִמּוֹ מָאתַיִם הַזְּכָרִים. ע חה מִבְּנֵי שְׁכַנְיָה בֶּן-יַחֲזִיאֵל וְעִמּוֹ שְׁלֹשׁ מֵאוֹת הַזְּכָרִים. ע חו וּמִבְּנֵי עָדִין עֶבֶד בֶּן-יוֹנָתָן וְעִמּוֹ חֲמִשִּׁים הַזְּכָרִים. ע חז וּמִבְּנֵי עֵילָם יְשַׁעְיָה בֶּן-עֲתַלְיָה וְעִמּוֹ שִׁבְעִים הַזְּכָרִים. ע חח וּמִבְּנֵי שְׁפַטְיָה זְבַדְיָה בֶּן-מִיכָאֵל וְעִמּוֹ שְׁמֹנִים הַזְּכָרִים. ע חט מִבְּנֵי יוֹאָב עֹבַדְיָה בֶּן-יְחִיאֵל וְעִמּוֹ מָאתַיִם וּשְׁמֹנָה עָשָׂר הַזְּכָרִים. ע חי וּמִבְּנֵי שְׁלוֹמִית בֶּן-יוֹסִפְיָה וְעִמּוֹ מֵאָה וְשִׁשִּׁים הַזְּכָרִים. ע חיא וּמִבְּנֵי בֵבַי זְכַרְיָה בֶּן-בֵּבָי וְעִמּוֹ עֶשְׂרִים וּשְׁמֹנָה הַזְּכָרִים. ע חיב וּמִבְּנֵי עַזְגָּד יוֹחָנָן בֶּן-הַקָּטָן וְעִמּוֹ מֵאָה וַעֲשָׂרָה הַזְּכָרִים. ע חיג וּמִבְּנֵי אֲדֹנִיקָם אַחֲרֹנִיםוְאֵלֶּה שְׁמוֹתָם אֱלִיפֶלֶט יְעִיאֵל וּשְׁמַעְיָה וְעִמָּהֶם שִׁשִּׁים הַזְּכָרִים. ע חיד וּמִבְּנֵי בִגְוַי עוּתַי וזבוד (וְזַכּוּר) וְעִמּוֹ שִׁבְעִים הַזְּכָרִים.

ע חטו וָאֶקְבְּצֵם אֶל-הַנָּהָר הַבָּא אֶל-אַהֲוָא וַנַּחֲנֶה שָׁם יָמִים שְׁלֹשָׁה וָאָבִינָה בָעָם וּבַכֹּהֲנִים וּמִבְּנֵי לֵוִי לֹא-מָצָאתִי שָׁם. ע חטז וָאֶשְׁלְחָה לֶאֱלִיעֶזֶר לַאֲרִיאֵל לִשְׁמַעְיָה וּלְאֶלְנָתָן וּלְיָרִיב וּלְאֶלְנָתָן וּלְנָתָן וְלִזְכַרְיָה וְלִמְשֻׁלָּםרָאשִׁים וּלְיוֹיָרִיב וּלְאֶלְנָתָן מְבִינִים. ע חיז ואוצאה (וָאֲצַוֶּה) אוֹתָם עַל-אִדּוֹ הָרֹאשׁ בְּכָסִפְיָא הַמָּקוֹם וָאָשִׂימָה בְּפִיהֶם דְּבָרִים לְדַבֵּר אֶל-אִדּוֹ אָחִיו הנתונים (הַנְּתִינִים) בְּכָסִפְיָא הַמָּקוֹםלְהָבִיא-לָנוּ מְשָׁרְתִים לְבֵית אֱלֹהֵינוּ. ע חיח וַיָּבִיאוּ לָנוּ כְּיַד-אֱלֹהֵינוּ הַטּוֹבָה עָלֵינוּ אִישׁ שֶׂכֶלמִבְּנֵי מַחְלִי בֶּן-לֵוִי בֶּן-יִשְׂרָאֵל וְשֵׁרֵבְיָה וּבָנָיו וְאֶחָיו שְׁמֹנָה עָשָׂר. ע חיט וְאֶת-חֲשַׁבְיָהוְאִתּוֹ יְשַׁעְיָה מִבְּנֵי מְרָרִי: אֶחָיו וּבְנֵיהֶם עֶשְׂרִים.

ע חכ וּמִן-הַנְּתִינִים שֶׁנָּתַן דָּוִיד וְהַשָּׂרִים לַעֲבֹדַת הַלְוִיִּםנְתִינִים מָאתַיִם וְעֶשְׂרִים: כֻּלָּם נִקְּבוּ בְשֵׁמוֹת. ע חכא וָאֶקְרָא שָׁם צוֹם עַל-הַנָּהָר אַהֲוָא לְהִתְעַנּוֹת לִפְנֵי אֱלֹהֵינוּלְבַקֵּשׁ מִמֶנּוּ דֶּרֶךְ יְשָׁרָה לָנוּ וּלְטַפֵּנוּ וּלְכָל-רְכוּשֵׁנוּ. ע חכב כִּי בֹשְׁתִּי לִשְׁאוֹל מִן-הַמֶּלֶךְ חַיִל וּפָרָשִׁיםלְעָזְרֵנוּ מֵאוֹיֵב בַּדָּרֶךְ: כִּי-אָמַרְנוּ לַמֶּלֶךְ לֵאמֹר יַד-אֱלֹהֵינוּ עַל-כָּל-מְבַקְשָׁיו לְטוֹבָה וְעֻזּוֹ וְאַפּוֹ עַל כָּל-עֹזְבָיו. ע חכג וַנָּצוּמָה וַנְּבַקְשָׁה מֵאֱלֹהֵינוּ עַל-זֹאת וַיֵּעָתֵר לָנוּ. ע חכד וָאַבְדִּילָה מִשָּׂרֵי הַכֹּהֲנִים שְׁנֵים עָשָׂרלְשֵׁרֵבְיָה חֲשַׁבְיָה וְעִמָּהֶם מֵאֲחֵיהֶם עֲשָׂרָה. ע חכה ואשקולה (וָאֶשְׁקֳלָה) לָהֶם אֶת-הַכֶּסֶף וְאֶת-הַזָּהָב וְאֶת-הַכֵּלִיםתְּרוּמַת בֵּית-אֱלֹהֵינוּ הַהֵרִימוּ הַמֶּלֶךְ וְיֹעֲצָיו וְשָׂרָיו וְכָל-יִשְׂרָאֵל הַנִּמְצָאִים. ע חכו וָאֶשְׁקְלָה עַל-יָדָם כֶּסֶף כִּכָּרִים שֵׁשׁ-מֵאוֹת וַחֲמִשִּׁים וּכְלֵי-כֶסֶף מֵאָה לְכִכָּרִים זָהָב מֵאָה כִכָּר. ע חכז וּכְפֹרֵי זָהָב עֶשְׂרִים לַאֲדַרְכֹנִים אָלֶף וּכְלֵי נְחֹשֶׁת מֻצְהָב טוֹבָה שְׁנַיִםחֲמוּדֹת כַּזָּהָב. ע חכח וָאֹמְרָה אֲלֵהֶם אַתֶּם קֹדֶשׁ לַיהוָה וְהַכֵּלִים קֹדֶשׁ וְהַכֶּסֶף וְהַזָּהָב נְדָבָה לַיהוָה אֱלֹהֵי אֲבֹתֵיכֶם. ע חכט שִׁקְדוּ וְשִׁמְרוּ עַד-תִּשְׁקְלוּ לִפְנֵי שָׂרֵי הַכֹּהֲנִים וְהַלְוִיִּם וְשָׂרֵי-הָאָבוֹת לְיִשְׂרָאֵלבִּירוּשָׁלִָם: הַלִּשְׁכוֹת בֵּית יְהוָה. ע חל וְקִבְּלוּ הַכֹּהֲנִים וְהַלְוִיִּם מִשְׁקַל הַכֶּסֶף וְהַזָּהָב וְהַכֵּלִיםלְהָבִיא לִירוּשָׁלִַם לְבֵית אֱלֹהֵינוּ.

ע חלא וַנִּסְּעָה מִנְּהַר אַהֲוָא בִּשְׁנֵים עָשָׂר לַחֹדֶשׁ הָרִאשׁוֹןלָלֶכֶת יְרוּשָׁלִָם וְיַד-אֱלֹהֵינוּ הָיְתָה עָלֵינוּ וַיַּצִּילֵנוּ מִכַּף אוֹיֵב וְאוֹרֵב עַל-הַדָּרֶךְ. ע חלב וַנָּבוֹא יְרוּשָׁלִָם וַנֵּשֶׁב שָׁם יָמִים שְׁלֹשָׁה. ע חלג וּבַיּוֹם הָרְבִיעִי נִשְׁקַל הַכֶּסֶף וְהַזָּהָב וְהַכֵּלִים בְּבֵית אֱלֹהֵינוּ עַל יַד-מְרֵמוֹת בֶּן-אוּרִיָּה הַכֹּהֵן וְעִמּוֹ אֶלְעָזָר בֶּן-פִּינְחָס וְעִמָּהֶם יוֹזָבָד בֶּן-יֵשׁוּעַ וְנוֹעַדְיָה בֶן-בִּנּוּיהַלְוִיִּם. ע חלד בְּמִסְפָּר בְּמִשְׁקָל לַכֹּל וַיִּכָּתֵב כָּל-הַמִּשְׁקָל בָּעֵת הַהִיא.

ע חלה הַבָּאִים מֵהַשְּׁבִי בְנֵי-הַגּוֹלָה הִקְרִיבוּ עֹלוֹת לֵאלֹהֵי יִשְׂרָאֵל פָּרִים שְׁנֵים-עָשָׂר עַל-כָּל-יִשְׂרָאֵל אֵילִים תִּשְׁעִים וְשִׁשָּׁה כְּבָשִׂים שִׁבְעִים וְשִׁבְעָה צְפִירֵי חַטָּאת שְׁנֵים עָשָׂר: הַכֹּל עוֹלָה לַיהוָה.

ע חלו וַיִּתְּנוּ אֶת-דָּתֵי הַמֶּלֶךְ לַאֲחַשְׁדַּרְפְּנֵי הַמֶּלֶךְ וּפַחֲווֹת עֵבֶר הַנָּהָר וְנִשְּׂאוּ אֶת-הָעָם וְאֶת-בֵּית הָאֱלֹהִים.