WLC - Consonants Only 1 בצאת ישראל ממצרים בית יעקב מעם לעז׃ 2 היתה יהודה לקדשו ישראל ממשלותיו׃ 3 הים ראה וינס הירדן יסב לאחור׃ 4 ההרים רקדו כאילים גבעות כבני־צאן׃ 5 מה־לך הים כי תנוס הירדן תסב לאחור׃ 6 ההרים תרקדו כאילים גבעות כבני־צאן׃ 7 מלפני אדון חולי ארץ מלפני אלוה יעקב׃ 8 ההפכי הצור אגם־מים חלמיש למעינו־מים׃ Westminster Leningrad Codex. For comparative study, where possible, chapter and verse numbers are mapped to the traditional convention used by modern English texts. |
    |